Ժամանակի ընթացքում բիթքոյնը կընդունեն գրեթե բոլոր պետությունները՝ Սամսոն Մոու

Jan3-ի հիմնադիր Սամսոն Մոուն (Samson Mow) իր What Bitcoin Did փոդքաստում հայտարարել է, որ շատ երկրներ աստիճանաբար հաղթահարում են կրիպտոարժույթների նկատմամբ ունեցած սկեպտիցիզմը և արդեն մշակում են բիթքոյնի ներդրման ռազմավարություններ։ Մոուի խոսքով՝ պետությունները դանդաղորեն անցնում են բիթքոյնի փորձնական փուլից դեպի արագ աճող հետաքրքրության փուլ։

Նրա համոզմամբ՝ շուտով կառավարությունների մոտ կսկսվի «կորցրած հնարավորությունների վախի» (FOMO) զանգվածային փուլ, և բազմաթիվ երկրներ կշտապեն ստեղծել բիթքոյնային ռազմավարական պահուստներ՝ հետևելով Միացյալ Նահանգների օրինակին։

Այս տարի ԱՄՆ նախագահ Դոնալդ Թրամփը ստորագրել է հրամանագր՝ կրիպտոապահուստ ստեղծելու մասին։ Ներկայումս ԱՄՆ-ի տիրապետության տակ է գտնվում 198 012 BTC, ինչը երկրին դարձնում է ամենամեծ կրիպտոարժույթների պահողը։ Սակայն Մոուն զգուշացրել է, որ մրցակից երկրները, ներառյալ Պակիստանը, կարող են առաջ անցնել ԱՄՆ-ից կրիպտոապահուստի զարգացման մեջ, եթե Վաշինգտոնը թողնի այս նախաձեռնությունը։ Դեռ մայիսին Պակիստանը հայտարարել էր բիթքոյնային պահուստ ստեղծելու մտադրության մասին։

Մոուն նաև նշել է Լատինական Ամերիկան՝ ընդգծելով, որ այդ տարածաշրջանի երկրները նույնպես պատրաստ կլինեն պետական մակարդակով ներդնել բիթքոյն՝ ազգային ֆիատային արժույթների արժեզրկման ռիսկերը նվազեցնելու նպատակով։ Սեպտեմբերին Պարագվայի իշխանությունները սկսել են քննարկել բիթքոյնային պահուստային հիմնադրամ ստեղծելու հնարավորությունը։

Այնուամենայնիվ, բիթքոյնի փոխարժեքի դինամիկան որոշ չափով չի արդարացրել Մոուի 2025 թվականի սպասումները։ Նրա հաշվարկներով՝ կրիպտոշուկայում արդեն պետք է սկսված լիներ «ցուլի փուլը», որը կարող էր շարունակվել մինչև 2026 թվականը։ Ներկայումս բիթքոյնի արժեքը կազմում է շուրջ 120 900 ԱՄՆ դոլար, ինչը մոտ 7 %-ով ավելի է, քան նախորդ ամսին, իսկ շուկայի կապիտալիզացիան կազմում է 2,4 միլիարդ դոլար։

Ավելի վաղ Jan3-ի գլխավոր տնօրենը ենթադրել էր, որ էթերի (Ethereum) տերերը կվաճառեն իրենց ակտիվները, երբ դրա գինը բարձրանա, և ստացված գումարները կներդնեն բիթքոյնում։