Մայքլ Սեյլոր․ Ահա թե որքան դոլար է Strategy-ն պատրաստ ծախսել բիթքոյնների վրա։

Ամերիկյան Strategy ընկերության տնօրենների խորհրդի նախագահ և համահիմնադիր Մայքլ Սեյլորը (Michael Saylor) Market Disrupters փոդքասթին տված հարցազրույցում հայտարարել է, որ իր ընկերությունը կարող է մեկ ժամում 100 միլիոն դոլարը փոխարկել բիթքոյնի։

Սեյլորի խոսքով՝ այն ընկերությունները, որոնք ընտրում են ներդրումներ կատարել առաջին կրիպտոարժույթում, ունակ են ակնթարթորեն փոխակերպել ֆիատային փողերը թվային ակտիվի։ Այդ ներդրումային ցիկլը, ըստ նրա, հազար անգամ ավելի արագ է, քան տեխնոլոգիաներում, անշարժ գույքում, նավթում կամ գազում ներդրումները։

«Երբեմն մենք բառացիորեն մեկ ժամում վաճառում ենք 50 կամ 100 միլիոն դոլարի արժեթղթեր և նույն ժամում գնում բիթքոյն։ Կարող ենք մեկ օրվա ընթացքում ներգրավել մինչև միլիարդ դոլար կապիտալ, ունենալ 20 միլիոն դոլարի պորտֆել ժամը 16:00-ին, իսկ արդեն 17:00–18:00-ին ամբողջությամբ փակել գործարքը», — նշել է Սեյլորը։

Նա ընդգծել է, որ Strategy-ն կարող է շատ ավելի արագ կուտակել բիթքոյններ և ապահովել եկամտաբերություն, քան, օրինակ, շինարարական ընկերությունները, որոնց համար շահույթ ստանալը կարող է տևել մի քանի տարի։

Սեյլորը կարծում է, որ իր մոդելի քննադատները պարզապես «ռազմավարական անտեղյակություն» են ցուցաբերում՝ չփորձելով հասկանալ, թե ինչպես է գործում կրիպտոարժույթների ոլորտը։ Նրանք, ըստ նրա, բաց են թողնում այն հնարավորությունները, որոնք տալիս է բիթքոյնը։

Ավելի վաղ Մայքլ Սեյլորը կոչ էր արել բիթքոյնում ներդրումներ կատարող մարդկանց չտրվել պեսիմիզմին և չվախենալ շուկայի անկումներից։